浮誇的Bon與Dau

好多謝Edith姨姨送呢兩個咁靚嘅collars俾我地。 全因為媽媽提議俾Edith姨姨話Elaine姐姐嘅首飾design咁靚，不如試吓幫狗狗design一吓，呢個market都唔細喎！ 呢個collar好靚，但係我地未試過新嘢，初次試戴就愁愁地啦！ 不過都要多謝Elaine姐姐，順道响度幫佢賣吓廣告先！

戴咗呢兩個bling bling collars，我地仲唔係全宇宙最浮誇嘅狗狗!?

Sweet&Co.

http://www.shopsweetandco.com/en/index.php

攝於我2008年生日

回家後第一星期

B＆D已經返咗嚟一個禮拜喇，呢個星期係從未試過咁challenging。 好好彩，佢地適應能力都好高，同埋都學識咗幾門手藝，哈！ 咪最其本嘅sit，stay，hand咁咯！ 趁weekend，同兩個mummy去飲茶，仲專登叫佢地入嚟跑馬地，話不如之後上嚟坐坐！ 一入屋見佢地傻更更望住，嚇咗兩個mummy一跳，但係又覺得佢地得意喎！ 而BonBon同DauDau一啲都冇生保，見人就跳上去，見人走lam。 之後嗰日，Gary fafa toto louis同JJ都過咗嚟探佢地。而JJ其實好怕狗，但我相信佢會克服到，因為佢都係由手板咁大睇住佢地大，又知性格咁溫純，點會仲驚呢！



狗狗爭手巾

回家日

前一晚異常緊張，雖然已經將間房佈置好準備接B＆D返嚟，但腦裡面不停諗佢地真係返咗嚟會係點。佢地容唔容易適應新環境？ 會唔會容易病？ 會唔會正常咁食飯飲水？ 好多問號....

一大早起身，大概十點鐘出發到Fannie度。個天落緊微雨，我地泊咗車係樓下，就上去接佢地。如常扭扭擰擰周屋走，原來啱啱食完糧，等緊去poo poo。 走喇！其他兩隻冇乜反應，而媽媽miumiu就一早帶咗佢入房，Fannie kiss kiss之後就帶B＆D走喇。喺車度好平靜，好乖，梗係啦，第一次去街街，仲第一次坐車，對佢地嚟講乜都好神奇！ 終於返到屋企喇，放佢地落地之後佢地周圍聞，屋頭行到屋尾，聞聞聞，又周圍望，個樣有少少愁，但知道佢地冇抗拒。過咗冇耐，佢地各自搵到自己嘅comfort zone休息喇。

過咗一陣，就開始同佢地玩，俾個玩具同毛巾，已經好開心。睇反應，似乎BonBon好似學習能力高啲，佢會係比較活躍同埋醒啲，而DauDau就慢熱，需要多啲時間先領會到。雖然係咁，但今日都有achievement喎，就係佢地識聽 "sit" 喇，咁當然，要有好味嘅芝士幫手先得嘅！ 另外，佢地好似識得邊度係pee pee嘅地方，人地話識得邊度去同幾時去係好難教，希望呢樣唔係曇花一現啦!

久唔久佢地就會玩打交，打完就休息，起身再玩玩具同打打！見到佢地都適應新環境，都安心啲！咁亦都覺得我地當初要兩隻嘅決定係冇錯，如果得一隻嘅話，邊個同佢咬咬同打打先!?

BonBon 俾爸爸教訓

自從去Boracay旅行前見過B＆D，已經十日喇，好掛住佢地喎！我諗佢地一定大咗好多。 今日去到，見Fannie抱住BonBon愁眉苦面咁，話BonBon啱啱俾爸爸BeBe噬咗一啖，而家左眼紅哂。 可能係因為BonBon唔知個水兜係爸爸嘅就走埋去飲，BeBe又唔識要讓個女飲水，咪攪到咁咯！ 過咗冇耐，見BonBon活躍返哂先冇咁擔心咋。賓賓姐姐Rinnie話佢喺廚房無端端聽到撕殺聲，走出去時小Bon已經受咗傷。不過最好笑係，哥哥Lucky對住爸爸不停咁吠，可能話佢蝦個妹妹，都真係幾sweet！

睇吓佢地，已經大個女喇！而家嘅size要抱哂兩隻有啲難度。 DauDau都唔知學邊個，而家鐘意喱埋喺梳化底，要搬開張椅先捉到佢返出嚟。 個半月大喇，兩個嘅性格開始睇得出分別。BonBon比較活躍，成個男仔咁；而DauDau就遺傳咗媽媽MiuMiu，非常女仔。

又一齣打鬥片

BB 學行路時拍嘅，好可愛

fafa 與 nelson - 一見鐘情?

BonBon DauDau 已經一個月大喇。阿力仲買咗部新玩具Sony Handycam去見證佢地嘅成長 。今日放工，我地帶埋阿妹同fafa去探babies。當fafa見到Nelson，我就知乜嘢叫一見鐘情 Love at first sight，哈，sorry，只係一方面啫，Nelson根本唔得閒理邊個探佢因為佢好多時候都瞓咗覺。fafa真係有一絲衝動諗住要Nelson，好彩呢個念頭一閃而過，備過一場浩劫，如果唔係就害咗一隻無孤嘅小生命！

第二日，我地show咗拍低嘅video俾Gali睇佢都覺得佢地好得意，所以呢日都帶咗佢上去探bb。下面嘅video係DauDau pee完喺地下之後拍嘅，睇吓佢，又扮唔知同無知，完全無顧自己做咗乜！

呢個video係BonBon三個禮拜大時拍嘅

第一次接觸

記得某個禮拜日我同阿力响petshop睇中一隻四個月大，好靚女嘅西摩BB，諗住星期一放工去買，點知去到原來已經俾人買咗。新主人阿Rei仲喺度等緊帶佢走，咁當然順便傾傾計啦。阿Rei話我可以上88db.com嘅西摩forum睇，見過有人post話有西摩BB出售。 都過咗一斷日子，三月中某日心血來潮上去睇，真係有post話三月尾會有一胎BB出世，有興趣者msn佢。後來聯絡上Fannie，得知佢對西摩仔女即將生第二胎，今次有四隻，會安排見面。 其實我地都諗過買隻BB由細睇到大，個bonding會好啲。果然真係俾我地搵到。

四月頭終於安排到去Fannie屋企睇BB，當時狗狗都係得兩個禮拜大，兩個都係女。我地企响門口，消毒咗對手，Fannie就攞個盤出嚟，裡面就係BonBon同DauDau啦。兩隻BB打橫瞓咗喺度，size只有比手板大啲，好fragile。當時仲係叫JJ同Heidi，Fannie將啲friend嘅名放喺佢地度。由於太細睇唔出靚唔靚女，唯有睇啲毛色，經過我，JJ，mui，阿力一輪磋商，我地決定要JJ!

努力睇書，上網學點樣養西摩，發覺佢地係超active嘅breed，我同阿力諗諗吓不如要埋Heidi，咁我地返工冇人喺屋企嘅時候咪冇咁悶啦！就係咁BonBon同DauDau就成為我家嘅一分子喇。