老強親善訪問

呢排又打風，又落雨，除咗天氣翳侷之餘，仲多咗好多「朋友仔」探訪。近期真係少咗入廚房，因為入親去都見到四腳蛇咁滯，好唔開心！禽晚，颱風「獅子山」竟然再次吹返嚟香港，天文台再掛起一號風球。

放工返屋企，諗住坐定定睇電視，突然見有啲陰影係地下飄過，我初頭以為係塵，望真啲，原來係小強呀！不過係一隻橫行霸道，大搖大擺咁通處走嘅老強。曱甴之中佢都算行得慢喇，我見佢行咗入鋼琴底，我已經好alert咁攞定支拜高出嚟侍候。佢再出嚟時Bon同Dau終於見到，仲追注老強添！奇怪地，Bon仔比較aggressive啲，跟到實一實，而Dau反而聽到我怪叫之後，好alert咁左埋一邊，最後仲喱喺枱抵添。Bon完全有意欲去一啖食咗老強落肚，見老強施施然行過，我於是不理三七二十一就向佢狂噴拜高，噴到佢暈，噴到佢反肚為止，Bon一邊睇仲想走埋去攪埋一份，我就梗係阻止佢啦！見老強突然反肚腳撐撐時，我就一疊報紙撼住，加多一腳！Bon想去加一腳，我就喝停佢啦！至於善後工作，梗係留番俾親愛的去做喇！Bon仔就坐咗喺疊報紙旁，幫我睇實老強！

Bon同Dau都真係各有喜惡。一打風行雷，Bon就好驚，一定會黐實我，去到邊，黐到邊；反而Dau會好醒覺地望住個窗有乜動靜！而捉拿老強呢單嘢，反而阿Bon好主動，點叫佢都跟住隻曱甴，突然覺得佢好保護到我，至於Dau，佢竟然喱咗係凳底咯，你話奇唔奇!?

肥咗又靚咗

呢晚整理B＆D啲相，睇返佢哋細個啲相，尤其年多前嗰啲，相比之下，當時佢哋好瘦，啲毛都唔爆。睇返近期影嗰批，而家肥咗，靚咗，cute咗。

邊個?!

阿力話，今朝好勞氣！朝早沖完涼出到嚟，入房時見到床上面，應該係張被上面，有一大泡尿，而「兇手」當然不翼而飛。兩隻狗狗已經知衰喱喺枱底，當然無從稽考誰是兇手啦！但張大綿被咁就要報銷，啲尿尿已經索哂入被裡面，就算晒乾都冚唔落啦。

又嚟！

用咗新嘅狗廁所都好幾日，諗住穩穩陣陣，點知有日放工，一打開房門，登登登凳！

好肯定係豆豆嘅傑作，因為BonBon雖然笨啲，但佢有紀律啲喎，起碼好少周圍尿尿，更加唔會玩片片，但一但豆豆撩咗啲片出嚟，咁就唔擔保阿Bon唔玩埋一份！唉，於是我當然手握狼牙棒，大聲呼喝，兩隻嘢咪九秒九攝咗入檯底囉！