狗明星

今日剛病好，諗諗吓不如出去吸吓新鮮空氣好過留喺屋企啦，而咁啱啲朋友又喺赤柱食lunch，於是決定帶埋對小朋友入去走走。 泊好架車落去赤柱大街，沿路要行幾條扶手電梯，都幾狼狽，因為佢哋未坐過，又唔識，又驚佢腳仔攝咗入啲罅度。幾經辛苦落到大街，嘩，十一月喇，點解仲咁熱呀？啲人個個仲係背心短褲，好似夏天仲未過咁。我哋搵咗間路邊餐廳食lunch。BonBon同DauDau好乖咁坐喺地下，不過知道佢哋其實好熱好辛苦，所以不停俾水佢哋飲。

食完lunch個太陽好似冇咁猛，於是行咗去美利樓嗰邊，諗住等埋啲friend。 跟住嗰半個鐘就係Bon and Dau嘅世界。佢哋超級受歡迎，不停有人走過嚟話，好得意呀，可唔可以摸吓，可唔可以影相呀？好多小朋友本來好驚狗嘅都夠膽摸佢哋。而小狗又真係好乖咁俾任摸飲攬都無任歡迎，因為其實佢哋都好開心咁多人同佢哋玩。之後行市集時仲有小朋友記得佢哋個名添！

以佢哋嘅性格，我絕對有理由被佢哋成為狗醫生，但有朋友話，做狗醫生其實好易令狗狗有depression，因為佢哋會知道自己狗醫生嘅使命，一但見有人離開，佢哋會覺得自己做得唔好。好似當年911，好多救護狗做有depression，就係因為佢哋幫忙救援工作，可惜搵到嘅都係屍體，覺得自己好冇用。我都有擔心，但我又覺得佢哋真係有potential去令其他人開心，點解唔俾佢哋試吓呢？ 尤其DauDau，佢對身邊嘅人與事好sensitive，好識喺適當嘅時候做適當嘅事。不過，都係等佢哋兩歲先啦，因為呢個年齡係做狗醫生嘅基本條件嘛！

當時我們年紀少

PetWorld 十天度假營

我地又出門喇，三個禮拜前book SPCA，哈，滿哂額！咁墟冚？ 爸爸臨急臨忙响網上搵到啲喺山卡罅嘅 pet hotels，去視察過之後決定去位於元朗嘅 PetWorld，喺網上睇啲info都幾開心，有好大嘅草地俾佢地走，臨尾嗰日仲有得游水。最開心係 PetWorld會每日影啲相email俾我地睇，而游水日仲會拍埋video添！價錢其實同SPCA差唔得幾多，加多啲啲錢仲包埋接送添！

之前嗰晚執定書包，帶咗狗糧，零食，玩具，毛巾，一大個背囊，等一大清早架車嚟接。喺十日裡面，每日都期待收到PetWorld 嘅 email。每次打開，我地都好開心，因為見到Bon同Dau幅幅相都係笑。我諗佢地千萬個不願意返屋企啦，由萬幾呎地方，日日跑跑跳跳，去番八百呎屋仔，仲冇得癲咗咁跑，我都愁啦！

BANG!

前幾日望住B＆D，發覺自從教咗「turn」之後就冇再教佢地新tricks，諗到阿Sundae識得聽到「Slippers」就去耽拖鞋咁叻，都好喎，等佢地識得幫我攞拖鞋都好喎！於是我就用我自創嘅一套教佢地喇！

搵阿BonBon做白老鼠先，一手拎住塊令佢瘋狂嘅bacon，一手攞住隻拖鞋，夾硬擘大佢個口，然後塞落去，夾實，大叫「SLIPPER」。Bon喺咁擰個頭，擰甩隻拖鞋就掉頭走都走唔切！到豆豆，都係咁！我諗我個方法可能有啲問題，雖然我唔接受呢個係事實，哈！於是拎番本「Dog Tricks 101」出嚟睇，揭到有一頁係「Take my Slippers」，望落去，嘩，原來好高難度，要學識點點點，先至點點點，最後先「Slipper」到。都係搵個容易啲嘅trick算吧喇。

再揭，咦，呢個反身動作佢地本身成日做，咪容易教咯！呢個trick叫「BANG！」，即係叫佢扮死。

首先要佢sit咗先，再down，將粒treat由佢側面膊頭上，等佢跟住反轉身，跟住就BANG！兩個唔可以一齊教，因為好distract。每隻教咗幾次，第一晚最後阿DauDau好慢好慢，不過識得逐步逐步做哂一連串嘅動作。至於笨蛋BonBon，就一定要sit，跟住down，先再「BANG！」。

教完呢晚真係喉嚨痛，因為成晚不停咁BANG！

BonBon - Bye Bye 你條尾

BonBon:我冇得食

DauDau霸住舊骨頭，BonBon得個恨字，不過佢都嘗試問過下DauDau，都係失敗，哈！ 你話佢地係咪高EQ？ 一個爭唔到又唔吠，一個俾人爭又自得其樂唔會嘈！

激死我喇 ~~~~

呢晚由於得返我一個人，通常都習慣開着床頭燈瞓，半夜覺得太光瞓唔到先會熄咗佢。 呢晚無啦啦半夢驚醒，四點鐘彈起身，又咁啱俾我見到BonBon嗱住條電線咬緊，吓，呢條咪吸塵機條線？ 平時都放喺地下，點解無端端而家先嚟咬？ 唔通因為我我平時熄燈黑漆漆佢地睇唔到，而家開咗燈睇到攞嚟玩？ 條電線已經斷開咗兩截，佢嗱住其中一邊好似食雪條咁，激死我喇!!!!   當我地四目交投嘅時候，BonBon好無知咁個口仲趙吓趙吓，我終於把持不住，喺凌晨四點鐘劃破夜空，大叫 -- 邊~~~ 個~~~，再去追殺佢！ 隔離屋唔知會唔會以為我有賊入屋呢！?

總之就大件事啦，一係就買返部吸塵機，或者試吓電器舖有冇得淨係換電線嘅服務啦。

街坊 Bear Bear 生日會

話咁快阿Bear已經四歲生日，今日Bear主人邀請我地到佢屋企開party。除咗Candy隻SecQ之外，其他狗都未見過。B＆D又試令我地出醜喇！每隻輪住賴咗一次尿尿！都唔知點先可以教得掂！

呢個生日蛋糕好靚呀，外面綠色嘅係波菜蓉

睇吓阿Bear幾靚女，不過原來呢頂帽好巴閉，阿Bear一戴之後就會坐定定唔會郁

呢兩張自拍大合照唔錯喎

呢個小朋友叫Rusty，強項係 "因乜差事跳跳跳"，最鐘意跳上檯，或者用啲傢俬做踏腳石，全屋跳

SecQ嘅男朋友Cheeze Doy呀！佢得五個月大，但係都幾惡，邊個行埋去就嗚邊個，不過主人話佢得巴聲喎

SecQ同Cheeze，希望不久將來會有chihuahua BB面世啦

朱古力，鐘意自己靜靜咁坐埋一邊，睇實個袋。主人話本來都冇諗帶佢出街，係朱古力自己擔個袋都客廳中間，然後自己跳入去

向狗狗學習

狗狗雖然唔識講說話，但從佢地嘅身體語言或者表情都可以知道佢地想點樣。BonBon 同 DauDau 可能係西摩嘅關係，開心嘅時候一定帶住上天賜予呢種狗嘅天真笑容，相反，唔開心嘅表情，你一定可以認定佢地係唔開心緊。

唔知係咪呢種狗嘅天生性格，西摩真係好好 EQ，覺得自己都要好好向佢地學習。有啲時候佢地做錯事俾我鬧都狗血淋頭，要逃亡嚟避開我嘅籐條，嗰陣時個樣就真係慘無人道咁。佢地雖然驚，但係都希望氹返我開心，唔好再嬲。佢地會用好懇切嘅眼神望住我，然後用手手拍拍我，好似講緊，喂喂，唔好嬲啦，下次唔敢喇，你話，仲點會想繼續鬧呢！

Apply落人類，其實好多時我地為咗一啖氣，點都唔肯低聲下氣氹返對方，有時只不過係一個眼神，一個動作，就已經解決。好似狗狗，基本上嘢都唔駛講，喺佢地世界根本冇意氣用事呢四個字，佢地只會諗到主人唔開心，要氹返佢，就係咁簡單。究竟人，係咪咁易做得到呢？

睇吓呢兩幅相，開心同愁真係好易睇咋! 我聽過一句好正嘅說話 狗狗係一種錫你多過錫自己嘅動物，我可以話，呢句說話係真嘅！

從錯誤中學習

教狗狗原來真係要從錯誤中學習。今朝起身發覺一隻紙拖鞋唔見咗一半，當然另一半已經喺佢地個肚仔度。第一時間當然係鬧鬧鬧，但即刻想到冇用，因為唔係即場逮捕，冇意思！於是我拿住剩餘嘅鞋放到客廳中間，逼佢地坐喺側邊，然後指住拖鞋大聲NO咗好多次，再行開。久不久出嚟check吓佢地有冇擔走隻鞋，一有舉動即刻大叫NO。久而久之，佢地知呢樣東東係唔掂得。其實BonBon同DauDau都真係好乖，除咗戒唔到食紙巾之外，大至上都唔會亂咬野，除非expose咗出嚟好似地膠之類啦，所以都要經常dog proof間屋，事關佢地真係玻璃肚嚟！

第二日俾兩隻流動鬧鐘準時八點鐘叫醒，發覺我另一隻綿質拖鞋又唔見咗一半.....

唉，教狗之路都仲係好遙遠....

豆豆著新衫

  

B＆D寄宿SPCA時我留底咗件衫俾佢地可以聞吓我嘅味，返嚟之後件衫梗係certified咗啦。於是丟棄佢之前俾豆豆着吓!

B&D於SPCA鬧事？

五月中去咗渡假，由於聽聞SPCA嘅boarding service唔錯，於是嗱嗱聲做咗member，再book時間。我鐘意佢地boarding嘅格局，因為好人道，唔會放啲大狗入籠，會放喺一個好似條保齡球道咁長，由地下至天花咁大空間嘅房間，所以我好放心。雖然boarding嗰日有啲唔捨得，見佢地係咁用好不安嘅眼神望住我，好似問我，吓，媽媽，你走嗱？

放低咗諗住叫阿妹同啲friend得閒去探吓佢地，應該相安無事啩！？旅程大概仲有兩日嘅時候，阿妹留咗個message俾我話SPCA打電話俾佢話B＆D打交，要分開佢地兩個籠！咁大件事？佢地出細之後就相依為命，加上佢地性格咁溫純，點會呀？不過我諗會唔會係佢地一來唔慣陌生地方，加上其他啲狗嘈爆，攪到佢地有啲偏激呀？

認都係唔放心，我自己俾個電話SPCA睇吓發生咩事。聯絡上了解到佢地夜晚時份成日玩wrestling，未停過。SPCA驚唔知佢地做乜，不過夜晚冇人當值，有啲咩事冇人知，所以決定分開佢地會安心啲。我都贊成嘅，雖然我覺得佢地係玩嘅乘數高啲。無啦啦要我洗多幾百蚊，激死！

一歲生日會

不經不覺，兩隻西摩小朋友BonBon同DauDau已經一歲大。咁重要嘅日子，仲要係第一次，點都要搞搞佢。問咗幾間dog cafe，決定揀成日都望到，但未去過嘅 Dogside Cafe。主要都係compare with Dog One Life。舊年Bear Bear生日去咗Dog One Life，地方唔算大，放到六七張台，但人嘅食物方面就好似唔係太多選擇。而Dogside呢，佢個set lunch有十三種食品揀，地方又幾寬敞，於是就試新嘢！

佢地兩隻嘢都唔知係咪知道今日係佢地大日子，放leash之後周圍走，成個PR咁，難得啲人又同佢地玩，咁講真，去得dog cafe都應該係鐘意小動物嘅，起碼唔會好似住我隔離屋嗰個阿姐咁,"我好驚呀，我真係好驚呀～～..." 好心咪學人住跑馬地啦！

Derek本來一早帶咗肥仔嚟，因為肥仔要熱身，如果唔整走佢啲energy，啲人嚟齊時就好麻煩。不過肥仔實在太激動，少少事都trigger到佢吠或者追殺，所以Derek都頂唔住要帶佢走先。

邀請咗好多朋友仔，有寵物冇寵物都有。而動物朋友仔包括souris，minou，sundae，肥仔，細佬，阿旺，仲有專誠book咗隔離台，阿妹同事嘅狗狗。

Dogside Cafe 預備嘅cake好cute呀，係魚骨型，有好多餅餅放喺上面。

今日爸爸仲幫佢地影左啲靚相添

最後，要多謝咁多位哥哥姐姐送嘅禮物，有好多snacks，今次有排食。仲有Edith姨姨嘅糧兜，好正，以後可以一齊食飯喇！