小狗趣事一則

話說每當要飲水或食飯時間，都係豆豆就過嚟哄哄我，我就知佢有所要求，問佢「要乜呀」，豆就會用頭頂一頂個水兜或者糧食袋，咁我就為佢哋效勞。呢個動作從來都未教過，豆自動自覺每一次如是。Bon就係小跟班，有水就飲，有飯就食。

今日，豆hea喺一邊歎冷氣，而Bon終於自己有所要求，望吓我，望吓個水兜。我諗，冇豆在旁，點都要學吓獨立，做吓嘢。咁我都係同佢講「要乜呀」，佢都係望吓我，再望個兜，我堅持要佢學識點要求我做嘢，但好幾次都係如是。豆無喇喇叫囂咗一聲，我就同Bon講，嗱，豆都話你喳呀，快啲做出要求！不過Bon生性小跟班，都係唔識做，激死！而突然之間，豆終於忍唔住，老遠就過嚟，二話不說，頂咗個兜一吓。大家姐真有風範，見Bon咁無助，自動幫拖，真係笑死咗！